رواية هموم رجل الفصل الثالث

رواية هموم رجل الفصل الثالث

    رواية هموم رجل الفصل الثالث


    ،،،،،،،بعد اسبوع
    ابراهيم،،،،،،صباح الخير حبيبتي
    تهاني،،،،،،صباح النور
    ابراهيم،،،،،،انا ماشي الي الشغل ماشي 
    تهاني،،،،،،ماشي
    ابراهيم،،،،،شكلك متحبيش اتنوضي الصبح
    تهاني،،،،،ايه تعرف منقدرش انقاوم انت اتحب تفطر
    ابراهيم،،،،،،عادي عادي توا انعدلو نومنا مش تبدي اتنوضي معاي متعبيش روحك يلا سلامات
    تهاني،،،،،، سلام
    ////طلع ابراهيم ومشي الي شغله وتهاني ولت رقدت
    ////وصلو لي شغله ورحبو بيه اصدقاء العمل يلي معاه وباركوله وخش الي مكتبه وقعد يخدم لين جي موعد مرواحه ف خطم علي امه
    ابراهيم،،،،،،يماااااا اهلين
    امه،،،،وليدي اهلين وينك استحشتك
    ابراهيم،،،،،اهوا قاعد ماشي حالي انتي كيف حالك
    امه،،،،،الحمدلله تمام
    ابراهيم،،،،،احمد وين
    امه،،،،،مشي الي الجامعة متاعه
    ابراهيم،،،،،اهااا كويس
    امه،،،،،احكيلي علي سفرتك وعلي وضعك انت ومرتك
    ابراهيم،،،،،،تمام التمام الحمد لله
    امه،،،،،باهي وليدي ربي يهنيك ان شاء لله
    ابراهيم،،،،، جبتلك البكلاوة يلي اتحبيها
    امه،،،،سلم وليدي ياربي
    ابراهيم،،،،سلمك وين بوي
    امه،،،،،اااااه يا ابراهيم كان تعرف
    ابراهيم،،،،ان شاء لله خير شن في
    امه،،،،،بوك هذا انا حاسة ان وراه شي دائما وهوا طالع ومعادش قاعد في الحوش وبدي زي الابله انكلمه ميردش عليا ومعادش ايعدل امس احمد مرواح الساعة 12 في الليل انا قلت بيغبرله ليلته
    ابراهيم،،،،،شن دارله
    امه،،،،،ولله ما دارله حاجة ولا كلمه
    ابراهيم،،،،،،،بالك مريض يما
    امه،،،،،فرقت حاله وفرقت مرضه هذا في وراه موضوع نفهم انا
    ابراهيم،،،،موضوع شني مثلا
    امه،،،،،مش عارفة يا وليدي لكن شيرته مذهوبة
    ابراهيم،،،،ربي يستر ان شاء لله
    امه،،،،،قبل تذكر انتم واخد ايرواح الساعة عشرة شن كان ايدير فيكم كان ايخلي فيكم راقدين في الجنان
    ابراهيم،،،،،لله يسامحه وخلاص
    امه،،،،،وليدي انت طيب ههههه احمد ايقولي بوي مش مسامحه علي يلي داره فيا لما كنت صغير
    ابراهيم،،،،،،هوا صح كان طاغي لكن طلعنا رجالة في الاخير
    امه،،،،،،ايه صح لكن وليداتي عذبكم شوية
    ابراهيم،،،،،خلاص امي فات الموضوع اهوا توا كبرنا وتزوجنا انسي
    امه،،،،،ايه ربي يحفظكم ان شاء لله
    ابراهيم،،،،،،وين احمد مزال مرواحش
    امه،،،،،لالا مزال
    ابراهيم،،،،كيف حال اسماء
    امه،،،،،الحمد لله
    ابراهيم،،،،،باهي يما كويس اهما خليهم عندك ( عطاها فلوس )
    امه،،،،،،وليدي صحيت ولله عندي خليهم عندك انت عريس
    ابراهيم،،،،،،يما ولله هما 200 مش هلبة خليهم عندك كان احتجتي حاجة تلقيهم
    امه،،،،،سلم وليدي ياربي
    ابراهيم،،،،،سلمك هي اتوصي علي حاجة
    امه،،،،،،سلامتك اتعالا بعد غدوة اتغدا هنا انت وتهاني
    ابراهيم،،،،،شن بعد غدوة هوا
    امه،،،،،،جمعة
    ابراهيم،،،،،باهي خلاص توا انجو
    امه،،،،،حتي امل بنت خالتك تبي اتجي اتبارك علي زواجك جيب تهاني واتعالا
    ابراهيم،،،،،علاش امل ماجتش في عرسي
    امه،،،،،لالا كانت مسافرة هي وفارس وتوا بتجي
    ابراهيم،،،،باهي مرحبتين بيها حاضر توا انجيب تهاني وانجي
    امه،،،،باهي وليدي في امان لله
    ////طلع ابراهيم ومشي الي حوشه وشري معاه حاجات خفيفة مشروب وهكي
    ابراهيم،،،،،السلام عليكم تهاني تهاني راقدة
    تهاني،،،،،لالا مش راقدة فايقة
    ابراهيم،،،،اهلين كيف الحال
    تهاني،،،،،احمد لله تمام
    ابراهيم،،،،خيرك تبكي شن في
    تهاني،،،،،شي
    ابراهيم،،،،،غير قولي علاش تبكي
    تهاني،،،،،،شي أهئ اهئ
    ابراهيم،،،،،غير فهميني شن في بس
    تهاني،،،،،شي مضايقة بس
    ابراهيم،،،،،استاحشتي اماليك
    تهاني،،،،،لالا امس كنت عندهم
    ابراهيم،،،،،باهي شن تبي قوليلي وانا انديرهولك
    تهاني،،،،،شي ابراهيم غير اتغير عليا الوضع هكي اضايقت
    ////وهنا ابراهيم احضنها
    ابراهيم،،،،،خلاص حبيبتي مضايقيش روحك توا تتعودي واماليك امتي ما تبيهم نرفعك عادي باهي
    تهاني،،،،،باهي
    ابراهيم،،،،،انتي كيف نضتي شكلك مش مطيبة
    تهاني،،،،،ايه كيف نضت
    ابراهيم،،،،،،باهي خلاص هي نوضي وتي روحك خلي نطلعو نتغدو برا انا جعان
    تهاني،،،،،باهي حاضر هي
    ////ناضت تهاني غيرت حوايجها وابراهيم قعد ايفكر ومحتار علاش تهاني تبكي
    تهاني،،،،،ابراهيم انا واتية
    ابراهيم،،،،هي هي
    ////طلعو الاثنين واتغدو وبرغم ان ابراهيم كان تعبان هلبة وكان متعود ايرواح يتغدا ويرقد ولكن قعد يدهور بي تهاني مش ايغيرلها جوها
    ////دار بيها ومشو الي البحر لين جت الساعة تسعة في الليل
    ابراهيم،،،،،تهاني هي انروحو بنرقد
    تهاني،،،،،باهي هي تعبت
    ابراهيم،،،،،لالا عادي بس اليوم نضت بكري نبي نرقد
    تهاني،،،،،باهي هي
    ابراهيم،،،،حق يوم اجمعة امي تبينا نتغدو عندها لان بنت خالتي وخالتي جايين
    تهاني،،،،،باهي عادي نمشو
    ابراهيم ،،،،باهي كويس
    ////وصلو الي الحوش ويدوب ابراهيم غير حوايجه واتلوح علي السرير ومشي في سبات عميق
    ////جت تهاني وغطاته ومشت الي الدار الثانية وقعدت تتفرج علي التليفزون وتبكي لين جي الفجر مش رقدجت
    ///ناض ابراهيم صلي الصبح وغير حوايجه وتهاني في سبات عميق
    ابراهيم،،،،تهاني تهاني
    تهاني،،،،ايوااا
    ابراهيم،،،،حبيبتي انا طالع باهي
    تهاني ،،،،،باهي سلامات
    ابراهيم،،،،،لو تبي شي اتصلي بيا
    تهانيً،،،،،حاضر
    ////طلع ابراهيم ومشي لي شغله وتهاني في سباااات عميق وهوا مرواح خطم علي المطم وجاب معاه عشي لان عارف ان تهاني راقدة
    ابراهيم،،،،السلام عليكم
    تهاني،،،،،،،--------
    ابراهيم،،،،،تهاني راقدة
    تهاني،،،،،اهلين جيت كيف الحال
    ابراهيم،،،،،الحمد لله يا كسولة الساعة ثلاثة نوضي
    تهاني،،،،،ايه امس رقدت امأخر
    ابراهيم،،،،،ايه حسيت بيك بنجيك تعرفي مش قادر انقيم رأسي
    تهاني،،،،،اهاا عادي عارفاتك تعبان
    ابراهيم،،،،،،باهي خلاص هي نوضي اغسلي وجهك جبت معاي غداء من برا صنته فظيعة وعندي ليك مفاجئة
    تهاني،،،،،لله شن هي
    ابراهيم،،،،،نوضي اغسلي وجهك توا انقولهالك
    تهاني،،،،،هي حاضر
    ////ناضت غسلت وجها وجت قعمزة جنبه
    تهاني،،،،،هي قول شن المفاجئة
    ابراهيم،،،،،كلمت المكتب ووصيت علي شغالة
    تهاني،،،،،لله احسن حاجة صحيت صحيت صحيت ولله تعرف مش عارفة كيف انخش فيه الحوش
    ابراهيم،،،،،عارفك دلوعة هذا علاش جبتلك لكن حبيبتي انتي توا عمرك 25 سنة يعني تعتبري كويسة فلهاذا انا جبتلك الشغالة هي اضم واطيب بش انا نبي لما انخش لي الحوش نلقاك نايضة وتستني فيا ونبي لما نرقد اتكوني حتي انتي راقدة باهي
    تهاني،،،،،حاضر بس امتي اتجي الشغالة
    ابراهيم،،،،،قالولي عشرة ايام واتية هي
    تهاني،،،،،ماشي كويس بكل
    ابراهيم،،،،،هي كولي
    تهاني،،،،،،حاضر
    ////كملو ماكلتهم وهما ايهدرزو
    تهاني،،،،،،ابراهيم عادي نطلب طلب
    ابراهيم،،،،ادليلي انتي
    تهاني،،،،،،نبي انجيب سيارتي
    ابراهيم،،،،،من وين
    تهاني،،،،،نبي انجيبها هنا قصدي نبي لما نحتاج حاجة نبدا انجيبها بروحي
    ابراهيم،،،،،هي السيارة سيراتك ليك انتي ولا حتي امك مشت كة فيها
    تهاني،،،،،سؤال غريب علاش
    ابراهيم،،،،،لا ماهو انشوف في امك اتسوق فيها قصدي لو امك اتسوق فيها خليهالها وانا توا نأخدلك سيارة
    تهاني،،،،،اهاا لالا سيارتي بابا شاريهالي انا ماما تستعمل في سيارة بابا
    ابراهيم،،،،،خلاص عادي جيبيها
    تهاني،،،،،شكرا شكرا شكرا
    ابراهيم،،،،عفوا عفوا عفوا تسلملي الضحكة
    ////كملو غداهم وبعدين اب اهيم رقد شوية وبعدينطلعو يدهورو هما الاثنين وجي يوم الجمعة
    ابراهيم،،،،،صباح الخير مرتي الكسلانة
    تهاني،،،،،صباح النور
    ابراهيم،،،،،خيره عيونك منفوخات كنتي تبكي
    تهاني،،،،انا لالا غير امس مشيت نتفرج علي التليفزون وسهرت ومرقدتش كويس
    ابراهيم،،،،،نوضي تهاني فهميني انتي عيونك منفوخات امتع بكي قوليلي خيرك
    تهاني،،،،،شي ابراهيم
    ابراهيم،،،،،،حبيبتي انتي مريضة
    تهاني،،،،،لالا شن مريضة
    ابراهيم،،،،،باهي هي نوضي وقت مش نمشو
    ////ناضت تهاني وابراهيم في سريره مستغرب علاش الدموع في عيون تهاني دائما زعما مريضة زعما متبينيش بالك هكي استاحشت اماليها بالك اماليها زوج ها بي الغصب يااااربي خيرها
    تهاني،،،،،ابراهيم انا طلعت من الحمام خش
    ابراهيم،،،،هي
    ////جهزو نفسهم واتجهو الي حوش عمي محمد خشت تهاني لقت خالتهم سعاد وامل واصلين ومعاهم مها واسماء سلمت عليهم وقعمزت
    امل،،،،الف الف مبروك
    تهاني،،،،،لله يبارك فيك
    سعاد،،،،،وين العريس خلي انباركوله
    تهاني،،،،،مشي الي الجمعة
    سعاد،،،،،اهاااا
    ///قعدو ايهدرزو وامل ومها واسماء في المطبخ ايوتو في الغداء
    ////وخيرية وسعاد كانو ايهدرزو بس تهاني كانت في عالم ثااااني
    ////روحو الرجال من الجمعة وخشو ابراهيم واحمد وخالد سلمو علي خالتهم
    سعاد،،،،،كيف حالك ابراهيم
    ابراهيم،،،،،تمام خالتي الحمد لله انتي كيف حالك وشن مدايرة
    سعاد،،،،،باهي تمام الحمد لله
    امل،،،،،اهلين ابراهيم كيف حالك
    ابراهيم،،،،انتي امل مشاااااااااااااء لله كبرتي
    امل،،،،،ههههههه
    سعاد،،،،،،ايه كبرت قداش ليك مشفتهاش
    ابراهيم،،،،،قدااااش ليا كيف حالك باهية
    امل،،،،،تمام الحمد لله وانت
    ابراهيم،،،،،الحمد لله تمام
    امل،،،،،،مبروك عليك
    ابراهيم،،،،،لله يبارك فيك العقبة ليك
    امل،،،،،شكرا
    /////حطو الغداء واتغدؤ وجي المغرب وخالتي سعاد وامل روحو وابراهيم وتهاني حتي هما روحو واسماء وخالد ركبو الي حوشهم
    مها،،،،،ماما خيرها تهاني
    خيرية،،،،،ولله ما نندري عليها خيرها
    مها،،،،،هكي ساكتة وسرحانة خيرها متعاركة مع ابراهيم
    خيرية،،،،،لالا مستحيل تعرفيه ابراهيم مش متع مشاكل وهوا جوه باهي
    مها،،،،،ممكن حامل بالك
    خيرية،،،،،انشاء لله بالك
    /////فات اليوم ووصلو ابراهيم ومرته الي حوشهم وقعمزو ايهدرزو
    ابراهيم،،،،،تهاني احكيلي علي حياتك كيف كانت
    تهاني،،،،،كيف يعني
    ابراهيم،،،،،،يعني كيف كنتي عايشة كيف كنتي اتفكري وشن طموحك
    تهاني،،،،،،مكانش عندي طموح لان القراية ومنحبهاش مجرد ما اتخرجت بديت كل همي نطلع ونلبس ونشري بس
    ابراهيم،،،،،باهي مش خاطرك اتكملي ماجستير
    تهاني،،،،،،لالالا يا ودي ولله ماعاد عندي خلوق الي القراية
    ابراهيم،،،،،،،،ههههههههههههههههههه
    تهاني،،،،،هههههه تضحك
    ابراهيم،،،،،هههههه شكلك كنتي مسكرة
    تهاني،،،،،بكل تعرف منحكيلكش
    تهاني،،،،،،باهي احكيلي انت علي طفولتك
    ابراهيم،،،،،طفولتي متشردة
    تهاني،،،،،ههههههه احكيلي
    ابراهيم،،،،،،،يا ستي عشت طفولة قاسية بي معني الكلمة بوي كان رجل صعب صعب صعب علي قد ما انقولك صعب صعب فينا قبل
    تهاني،،،،،احميلي علي مواقف
    ابراهيم،،،،،،،ههههه وحدة منهم كنا لما انا ولا خالد خوي انعطو اكثر من الساعة اشرة ايخلي فينا نرقدو في الجنان
    تهاني،،،،،حيييي باهي علاش متمشوش عند صحابكن
    ابراهيم،،،،،لالا هاذي قوانينه ايرقدك في الجنان وميخليكش تطلع برا ولا اتخش مرا خوي خالد دار روحه فالح وبوي مخلاشي ايخش مشي الي حوش صاحبه تعرص اطلع بوي في عز الليل ومشي الي حوش صاحبه ودارله العار غادي فلهاذا كنا نتفادؤ فيه وانباتو في الجنان مسكينة امي كانت مترقدش
    تهاني ،،،،،،حي هلبة هكي
    ابراهيم،،،،،ايييي هذا شوية كان مداير فينا حالة انا كانت امي اتسخف فيا كيف مترقدش علي خاطرنا انرواح بكري لكن خالد كان دائما وهوا راقد في الجنان ههههههه
    تهاني،،،،،،هههههههه حي ميشعفش
    ابراهيم،،،،،لالا ميشعفش بكل
    تهاني،،،،،،يناااري عليكم مبعدكم
    ابراهيم،،،،،تعرفي لكن الحمد لله طلعنا رجالة ولا
    تهاني،،،،،،ايه صح
    /////قعدو ايهدرزو لين خداهم النوم ورقدؤ
    /////فاتو العشرة ايام وجت الشغالة وتهاني فرحت بيها هلبة بس للاسف
    //// تهاني كانت مشمن النوع يلي تهتم بي نفسها وتلبس وهكي كانت عادية جدا وكانها مش متزوجة وبرغم ان ابراهيم جاب الشغالة بس تهاني قاعدة ترقد
    ////ابراهيم من كتر حبه ليها ايساير فيها وميبيش ايزعلها ودائما ايقول ان هي مدلعة هلبة فلهاذا اكيد صعب عليها كله مع بعضه وكان ايطمئن في نفسه وايقول توا تتغير معا مرور الوقت
    /////فات شهر وتهاني عايشة برنسيسة زمانها اتنوض الساعة ثلاثة دايما الغدي من برابعدين اتجهز نفسها وتمشي الي حوش بوها او تطلع هي وصحباتها
    وفي يوم
    ابراهيم،،،،،،حبيبتي اليوم عازمك علي العشاء ماشي
    تهاني،،،،،حبيبي لا تعرف بنمشو الي حوش عمتي عندها لمة وعازمتني
    ابراهيم،،،،،،باهي متقدريش اتفوتيها
    تهاني،،،،،انا خاطري جفيها العائلة كلها بتلتم
    ابراهيم،،،،،باهي ماشي عادي توا نحجز يوم ثاني شني تبيني انوصلك انا
    تهاني،،،،،لالا انا توا ماشية وبعدين بنمشي انا وماما المزين جنب حوشنا وبعدين واحد من خوتي بيرفعنا ماشي
    ابراهيم،،،،،باهي ومن بيرواح بيك
    تهاني،،،،،حبيبي اليوم بنبات في حوش اماليا
    ابراهيم،،،،،تهاني حبيبتي مش الاسبوع يلي فات قعدتي عندهم يومين ولله نستاحش فيك
    تهاني،،،،،حبيبي ولله حتي انا نستاحش في اماليا عادي الليلة بس وغدوة العشية انروا باهي
    ابراهيم،،،،،امري لله باهي بري
    تهاني،،،،،،،انحبك
    ابراهيم،،،،،شن قلتي
    تهاني،،،،،انحبكككككككككككك
    ابراهيم،،،،،،محلاك حتي انا انحبك هلبة
    تهاني،،،،،يلا هي سلامات
    ابراهيم،،،،،حق والشغالة متبيش ترفعيها
    تهاني،،،،خليها تقعد
    ابراهيم،،،،،بتقعد معاي بروحي ارفعيه وخليها عند اماليك
    تهاني،،،،،لالا حبيبي نقعد غير امكرر فيها عادي خلي تقعد
    ابراهيم،،،،،متغيريش عليا
    تهاني،،،،،،واثقة فيك الف في المية
    ابراهيم،،،،،،،،باهي مدامك واثقة فيا بري هي سلامات ردي علي تلفونك لما نتصل
    تهاني،،،،،حاااااظر
    //////لعت تهاني وابراهيم رقد وبعدين اتصل بيها قالته انعا انجهز في نفسها وقريب يطلعو
    ////ابراهيم اتصل بي خليل
    طووووط طوووط
    ابراهيم،،،،،،اهلا اهلا
    خليل،،،،،،اهلااااااااااا ياعريس الغفلة
    ابراهيم،،،،،،،عريس عينك
    خليل،،،،،شن تبي اكيد مصلحة نعرفك من يوم اتزوجت متصلتش بيا
    ابراهيم،،،،،مصح وجهك مش امس كنت انكلم فيك
    خليل،،،،،ايه انا يلي متصل مش حضرتك
    ابراهيم،،،،،مكثر دوتك اسمع تمشي الحوازة اليوم نلعبو كورة
    خليل،،،،،علاش المدام وين
    ابراهيم،،،،،،شن دخلك فيها انت مكثر اتقصقيصك
    خليل،،،،،ها ها ها ها ها
    ابراهيم،،،،،،ها ها ها تمشو ولا لا
    خليل،،،،،،ولله بي النسبة ليا ما عنديش اي مشكلة خلاص توا انكلم الاولاد ونسالهم
    ابراهيم،،،،،اكيد ما عندهم شي يعني شن بيكون وراهم
    خليل،،،،،،،،ايه اكيد
    ابراهيم،،،،،،باهي خلاص شوفهم وكلمني
    خليل،،،،،خلاص صكر هي انشوفهم وتوا نبعتلك رسالة
    ابراهيم،،،،اوكي سلام
    /////سكر وبعد شوية بعتله خليل وقاله ان الاولاد بيمشو ناض جهزو نفسه ومشي الي الحوازة
    /////بعد عشرة ايام ابراهيم راقد في العشية وتهاني تتفرج علي التلفيزون شرين تلفون ابراهيم
    تهاني،،،،،،ابراهيم ابراهيم نوض تلفونك ايشرين
    ابراهيم،،،،،مني
    تهاني،،،،،احمد رد عليه مرات تبي شي ضروري
    ابراهيم،،،،،،ماشي ،،،،الووو
    احمد،،،،،اهلين ابراهيم راقد
    ابراهيم،،،،ايه شن في
    احمد،،،،،اتعالا توا ضروري
    ابراهيم،،،،،علاش شن في
    احمد،،،،،،،،،،،،،،،،،،،،،،،،،،،،،،،،،،،،،،،،،،،،،،

    يتبع......


    جميع الحقوق محفوظة للمؤلفة حلا 

    لمتابعة صفحة المؤلفة علي الفيس بوك : من هنا
    abdalaziz
    @مرسلة بواسطة
    كاتب ومحرر اخبار اعمل في موقع فيتو الاخباريه .

    إرسال تعليق